Katekhismus HKBP Versi Bahasa Batak

 BAB I

BINDU PARJOLO

P A T I K N I D E B A T A

I.         Patik Parjolo

Ahu do Jahowa DebataM, ninna Debatanta. Ndang jadi marangkup Ahu bahenonmu Debatam.

Dia do lapatan ni i?

On do: Ingkon umbiar rohanta jala humolong jala umpos mida Debata asa mida nasa na adong.

II.      Patik Paduahon

Ndang jadi ganaonmu jala ndang jadi sumanonmu manang aha na di banuaginjang dohot na di banuatonga on ro di na di bagasan aek na di toru ni tano, ianggo tung gabe sisombaon manang siolon.

Dia do lapatan ni i?

On do: Ingkon dihabiari rohanta Debata jala ingkon holong rohanta di Ibana, asa ndang jadi iba marsomba tu sombaon manang tu ganaganaan, mangido hangoluan sian i, jala ndang jadi oloan begu manang ulpahan ni hadatuon, jala ndang jadi pos roha di ugasan hahomitan.

III.   Patik Patoluhon

‘Ndang jadi dohonon goar ni Debata, ianggo so ture dalanna. Ai hona uhumNa do sogot angka na marsineang di goarNa’.

Dia do lapatan ni i?

On do: Ingkon dihabiari rohanta Debata jala ingkon holong rohanta di Ibana, asa unang hita olo mamurai manang manolonnolon manang marujarujaran na roa, manang manmgansi marhite goar ni Debata; ai di na tarsosak dohot tangiang dohot pujipujian do sidohonon goar ni Debata.

IV.   Patik Paopathon

“Ingot hamu ma pabadiahon ari minggu i! Di na onom ari ma ula hamu nasa siulaonmu, alai anggo ari papituhon i, ari paradianan ni Jahowa Debatam do i. Ndang jadi ho mangula anggo di sadari i, manang anakmu pe manang borum, manang naposom lahilahi, manang naposom boruboru, ro di pinahanmu ro di pangisi ni huta ni halak pe na mangebati hutam. Ai di na onom ari do ditompa Debata langit dohot tano dohot laut dohot nasa isina; dung i maradian do Ibana di ari papituhon i. Dibahen i do umbahen na dipasupasu Debata Jahowa ari paradianan i jala diparbadiai”.

Dia do lapatan ni i?

On do: Ingkon dihabiari rohanta Debata jala ingkon holong rohanta di Ibana, asa unang tois rohanta di ajar na sian Hata ni Debata, ingkon badia do Hata ni Debata di rohanta jala ingkon ringgas rohanta tumangihon dohot mangguruhon.

V.      Patik Palimahon

“Ingkon pasangaphonmu do natorasmu asa martua ho, jala leleng mangolu di tano na nilehon ni Jahowa Debatam di ho”.

Dia do lapatan ni i?

On do: Ingkon dihabiari rohanta Debata jala ingkon holong rohanta di Ibana, asa unang lea rohanta mida natorasta dohot mida angka rajanta ro di angka natuatua. Ndang jadi paroonta rimas nasida, ingkon pantun do hita jala ingkon holong rohanta tu nasida, sioloan do nasida jala sisubuton do rohana.

VI.   Patik Paonomhon

“Unang ho mamunu”

Dia do lapatan ni i?

On do: Ingkon dihabiari rohanta Debata jala ingkon holong rohanta di Ibana, asa unang hita olo mambahen sahitsahit tu nasa na mangolu, ingkon roha pangoluhon do rohanta di nasa na mangolu.

VII.Patik Papituhon

“Unang ho mangalangkup”

Dia do lapatan ni i?

On do: Ingkon dihabiari rohanta Debata jala ingkon holong rohanta di Ibana, asa toman rohanta jala porman dohot pangalahonta ro di hatanta, ianggo angka naung marbagas i ingkon masiparhamaolan jala masihaholongan.

VIII.       Patik Paualuhon

“Unang ho manangko”

Dia do lapatan ni i?

On do: Ingkon dihabiari rohanta Debata jala ingkon holong rohanta di Ibana, asa unang hita olo mandobo hepeng di dongan jolma manang mambahen bisukbisuk mangalansumhon boniaga, ingkon sipagandaon ni rohanta arta ni dongan jala siramothononhon.

IX.   Patik Pasiahon

Unang ho olo manghatindanghon hata na so tutu maralohon dongan jolma.

Dia do lapatan ni i?

On do: Ingkon dihabiari rohanta Debata jala ingkon holong rohanta di Ibana, asa unang hita olo manggapgapi dongan jolma manang manjehehon manang pahatahatahon, paoruhon sangapnasida, ingkon niampinan do dongan jolma anggo so tangkas dope diboto salana. Holan uhum na denggan i do paboaboaon.

X.      Patik Pasampuluhon

Ndang jadi haliangan ni rohan bagas ni donganmu, ndang jadi haliangan ni roham dongan saripe ni donganmu, manang naposona baoa manang naposona boruboru, manang lombuna manang hodana, manang dia pe ugasan ni donganmu.

Dia do lapatan ni i?

On do: Ingkon dihabiari rohanta Debata jala ingkon holong rohanta di Ibana, asa unang hita olo marangkal mangarohai ugasan ni dongan jolma dohot ugasan tinadinghon ni ompuna, siurupan do nasida mangaramoti asa ugasanna. Angkup ni i ndang jadi bolabolaonta pardihuta ni dongan jolma manang naposona pe, siapoan do nasida jala sidasdason mandapothon ulaonna hian.

XI.   Pandok ni Debata taringot tu Patik nasampulu

Beha do pandok ni Debata taringot tu Patik nasampulu i? On do:

“Ahu do jahowa Debatam, ninna Debatanta, pargogo na so hatudosan jala parrimas, sai luluhononku do dosa ni amaama tu pinomparna ro disundut patoluhon, ro di sundut paopathon, pinompar ni angka na sogo roha di ahu, alai asi do rohangKu di angka na marriburibu angka na marholong ni roha di Ahu, na so mangalaosi PatikHi”.

Dia do lapatan ni i?

On do: Dipalumba Debata do hita disi, didok do pinsangonNa nasa namangalaosi PatikNa i. Dibahen i tama do dihabiari rohanta rimasNa, unang ma nilaosan PatikNa. Alai diparbagabaga do asi ni rohaNa, angkup ni i nasa na denggan di angka na so mangalaosi PatikNa. Dibahen i tama haholongan ni rohanta dohot haposan ni rohanta Ibana, jala las rohanta mangoloi PatikNa.

 BAB II

Bindu Paduahon

Hata Haporseaon ni Halak Kristen

I.     Ponggol Parjolo

Mula ni nasa na adong

“Ahu porsea di Debata Jahowa, I do Ama pargogo na so hatudosan, na tumompa langit dohot tano”.

Dia do lapatan ni i?

On do: Diparhatutu rohangku do adong Debata na tumompa nasa na manggulmit. Ditompa do dagingku marparnidaan, marparbinegean,marparnianggoan,marpanghilalaan, marpandaian, dilehon do roha tu tondingku jala dipatureture do i saluhutna rasirasa nuaeng; angkup ni i dilehon do tu au parabiton dohot sipanganon siganup ari, ro di nasa na hasea di ahu di hangoluan on; diramoti do ahu asa unang mago jala diondingi do ahu diparmaraan; luhutna i ndang sian denggan ni parangengku manang sian jinou ni tua; tung asi ni rohaNa sambing do i dohot denggan ni basaNa umbahen na dilehon; dibahen i tama hupapujipuji Ibana jala tama huoloi na nidokNa ala saluhutna i, paboa las ni rohangku di Ibana. I ma na tutu situtu!

II.  Ponggol Paduahon

Hata haluaon ni manisia

“Ahu porsea di Jesus Kristus Anak ni Debata Jahowa nasasada i; i ma na tinubuhon ni si Maria, na gabegabean sian Tondi Parbadia andorang so habubuhan. I do Tuhanta na tumaon na bernit di panguhuman ni si Latus, na mate tarpajal do Ibana di hau pinarsilang, na tuat tu banuatoru dung ditanom, na mulak mangolu di ari patoluhon, na manaek tu Surgo laho hundul tu siamun ni Debata Jahowa, AmaNa i pargogo na so hatudosan i, disi ma Ibana paima mulak sogot tu tano on manguhumi halak na mangolu dohot na mate”.

Dia do lapatan ni i?

On do: Na diparhatutu rohangku do Anak ni Debata situtu Jesus Kristus, na tinubuhon ni AmaNa di narobi ni narobi jala jolma situtu do Ibana ditubuhon si Maria andorang so habubuhan, I do Tuhanku na humophop ahu jala na manghamonanghon. Dipalua do ahu sian hamagoan, ahu na hona toru dohot sian dosa dohot sian hamatean dohot sian gomgoman ni sibolis i, ndada sere manang perak dibahen, tung mudarNa do na arga jala na badia dohot habebernit ni sian ni bagi na tinaonNa i dohot hamtean na so sian salaNa, asa Ibana nampuna ahu jala asa tigor rohangku jala bontor jala sonang mangoloi Ibana salelenglelengna di gomgomanNa; asa songon Ibana ahu na hehe sian hamtean, na mangolu jala manggomgomi salelenglelengna. I ma na tutu situtu.

III.             Ponggol  Patoluhon

Hata habadiaon ni halak Kristen

Ahu porsea di Tondi Parbadia, jala adong sada Huria na badia, Huria hatopan ni halak Kristen angka na badia, dohot di hasesaan ni dosa dohot di Hata i na mandok: Mulak mangolu do sogot daging ni halak naung mate, dohot di hangoluan na so ra suda.

Dia do lapatan ni i?

On do: Na diparhatutu rohangku do, na so tarbahen ahu porsea di Jesus Kristus Tuhanku manang mandapothon Ibana, ianggo tung sian roharohangku manang sian gogongku sandiri, na dijou Tondi Parbadia i do ahu marhite sian Barita Nauli, dilehon do asi ni rohaNa patiurhon rohangku, diparbadiai do rohangku jala dipatongtong do ahu dibagasan haporseaon na ture, tudos tu na binahenNa i nuaeng tu saluhut halak Kristen na di tano on; ai dijou do nasida jala dipapungu jala dipatiur do rohanasida jala diparbadiai jala dipatongtong do nasida di Tuhan Jesus dibagasan haporseaon na sasada i na tigor i. Angkup ni i buas do rohaNa manesa dosangku ganup ari, ro di dosa ni angka donganku na porsea; dung i pangoluonNa do ahu di ari parpudi ro di nasa na mate, dung i lehononNa do tu ahu dohot tu nasa na porsea di Tuhan Jesus hangoluan na so ra suda. I ma na tutu situtu.

BAB III
Bindu Patoluhon

Tangiang Na Pinodahon ni Tuhan Jesus tu Angka SiseanNa

I.     Hata Pamungkaan

“Ale Amanami na di banuaginjang!”

Dia do lapatan ni i?

On do: Apoapo ni Debata do i tu hita paboa Amanta situtu Ibana jala anakNa situtu hita, asa pos rohanta mangido tu Ibana songon pos ni roha ni dakdanak na mangido tu amana.

II.  Sipangidoan Parjolo

“Sai pinarbadia ma goarMu!”

Dia do lapatan ni i?

On do: Na badia hian do goar ni Debata, alai naeng ma badia goar ni Debata idaon ni rohanta, i do na tapangido disi.

Beha do pangalahona?

Songon on do: Molo polin Hata ni Debata pinodahon, unang adong na lipe, dung i molo badia parangenta songon parange na tama parange ni angka anak ni Debata, jadi ma i. “Ale Amanami na di banuaginjang sai urupi ma hami asa tung songon i hami”. Alai manang sie hita on na mamodahon goar poda jala na marparangehon parange na lipe sian na nidok ni Debata, i do na paroahon goar ni Debata. “Ale Amanami na di banuaginjang, ramoti ma hami, asa unang tung songon i hami!”

III.             Sipangidoon Paduahon

Sai ro ma harajaonMu!

Dia do lapatan ni i?

On do: Ia Harajaon ni Debata, sai na ro do i nang so itapangido,alai asa haru sahat ro tu hita on, i do na itapangido disi.

Beha do Pangalahona?

Songon on do: Dilehon Amanta na di banuaginjang i do tu hita Tondi Parbadia i, asa porsea hita di HataNa na badia i hinorhon ni asi ni rohaNa jala asa hita parangehon parange ni Debata di ngolunta on dohot di hangoluanta sogot salelenglelengna.

IV.             Sipangidoon Patoluhon

“Sai saut ma lomo ni rohaM di banuatonga on songon na di banuaginjang!”

Dia do lapatan ni i?

On do: Ia roha ni Debata na denggan jala na marasi i, na saut hian do nang so itapangido, alai asa tung saut rohaNa di hita on, i do na itapangido disi.

Beha do pangalahona?

Songon on do: Molo disegai jala disundati Debata nasa tahi dohot lomo ni roha ni angka na jahat i, angka roha ni sibolis i dohot roha ni hajolmaon dohot roha ni dagingta angka na naeng manundati Harajaon ni Debata jala na naeng mangambati hita, asa unang diparbadiai rohanta Goar ni Debata. Angkup ni i molo dipargogoi jala dipatongtong Ibana hita hot di HataNa dohot di haporseaonta i rasirasa mate hita. I do asi ni roha ni Debata dohot lomo ni rohaNa.

V.  Sipangidoon Paopathon

Lehon ma tu hami hangoluan siapari!

Dia do lapatan ni i?

On do: Dilehon Debata do nian hangoluan siapari dohot tu halak angka na jahat i, nang so itapangido alai asa dipaingot Debata hita marhatopothon asi ni rohaNa, asa mandok mauliate hita tu Ibana di na manjalo hangoluan siapari i hita sian Ibana. I do na itapangido disi.

Dia do lapatan ni hangoluan siapari i?

Sipanganon do i dohot siinumon dohot parabiton dohot arta dohot bagas dohot dongan saripe na burju dohot ianakhon na burju, ro di angka naposo ro di raja na tigor roha, dohot uhum na sintong, dohot ari na hasea dohot dame, dohot hisar ni daging dohot sangap, dohot aleale na denggan roha, dohot dongan sahuta na ture, ro di nasa na hasea di hajolmaon.

VI.             Sipangidoon Palimahon

Sesa dosanami songon panesanami di dosa ni dongan na mardosa tu hami.

Dia do lapatan ni i?

On do: Itapangido asi ni roha ni Amanta na di banuaginjang i, asa anggiat unang dijujur dosanta, jala asa anggiat unang biasan rohaNa ala dosanta i, mangoloi na itapangido sian Ibana. Ai apala tama lehononNa nian tu hita na itapangido dibahen na so ture i parangenta i, ai lan do dosanta ganup ari, sipinsangon do hita nian, i do na tama, alai sai asi ma rohana dilehon ma tu hita na itapangido, ai hita pe, na olo do hita dohot nasa rohanta manesa dosa ni angka na mardosa tu hita dohot sumuan uhum na denggan tu nasida.

VII.          Sipangidoon Paonomhon

Unang hami togihon tu pangunjunan.

Dia do lapatan ni i?

On do: Ia Debata ndang adong manang ise nian diunjuni, alai asa sai diramoti Debata hita, asa unang diansi sibolis i manang hajolmaon, manang roha ni dagingta i hita, jala asa unang olo hita manopot pandelean manang haurahon dohot hajahaton na asing, dung i molo tung adong sisongon i ro tu hita asa ditumpak hita monang. I do na itapangido disi.

VIII.       Sipangidoon Papituhon

Palua ma hami sian pangago.

Dia do lapatan ni i?

On do: Itapangido sian Debata hadadao ni nasa hamagoan ni daging dohot tondi dohot pansamotan dohot hasangaphon; angkup ni i itapangido sian Debata, hasonangan lehononNa tu hita di hasusuda ni bohalta; sai asi ma rohaNa, diboan ma hita sian rura hasusaan on tu banuaginjang tu lambungna. I do na itapangido disi.

IX.             Ujung ni Tangiang i

Ai Ho do nampuna Harajaon dohot hagogoon ro di hasangaphon saleleng ni lelengna. Amen

Dia do lapatan ni Amen?

Na mandok on do: Olo i ma tutu, jumpang ho ma na pinangidom. Umbahen na nidokhon hita mandok Amen, asa tung porsea rohanta naung lomo situtu roha ni Amanta na di banuaginjang i manangihon tangiangta i, diparbagabaga do oloanNa na itapangido ai Ibana do mandokhon hita mangidohonsa sian Ibana.

BAB IV

Bindu Paopathon

Pandidion

I.         Aha do lapatan ni Pandidion i?

Ia Pandidion i ndada holan aek sambing, aek na marsaor Hata ni Debata do aek i; ai tona ni Debata do umbahen na binuat aek i.

II.      Beha do pandok ni Debata?

Didok Tuhanta Jesus Kristus di ujung ni surat na sinurathon ni si Mateus: “Laho ma hamu, podai hamu ma saluhut bangso, didi hamu ma nasida tu bagasan goar ni Ama, Anak dohot Tondi Parbadia”.

III.   Aha do uli sian Pandidion i?

On do: Saluhut halak na porsea di Hata ni Debata dohot dibagasan bagabagaNa, dapotan hasesaan ni dosa, dapotan dohot haluaon sian hamatean dohot sian sibolis jala dapotan hasonangan salelenglelengna.

IV.   Dia do didok Debata bagabagaNa?

Didok Tuhanta Jesus Kristus do di ujung ni surat na sinurathon ni si Markus: “Na porsea jala tardidi dapotan haluaon; alai na so porsea i, hona uhum do.

V.      Beha do pangalaho ni aek i umbahen tung dihorhon i ulaon na sai godang?

Apala hinorhon ni aek i, na hinorhon ni Hata ni Debata do i, mandongani aek i dohot haporseaonniba na marhatutuhon mardongan Hata ni Debata aek i, ai anggo so Hata ni Debata dongan ni aek i, aek sambing do i, ndang tardok Pandidion; alai ia Hata ni Debata dongan aek i tardok ma Pandidion aek i.

Na suksuk do asiasi di aek hangoluan i; ai Pandidion paimbaruhon hatutubu do aek i honorhon ni Tondi Parbadia. Ai songon do didok si Paulus di suratna tu si Titus di bindu patoluhon: “Dipangolu Debata do hita marhitehite Pandidion paimbaruhon hatutubu binahen ni Tondi Parbadia na nilehonNa i, dihabuashon tu hita ala ni Jesus Kristus partuaanta i asa pintor hita ala ni asi ni rohaNa, jala asa di hita hangoluan na so ra suda songon na hinirim ni rohanta i”. I do na tutu situtu.

VI.   Dia do lapatan ni na tardidi?

On do: Siauponta do ganup ari hinorhon solsol ni roha dohot hinorhon ni paimbaruhon roha isara ni ompungta si Adam rap dohot dosanta ro di angka sangkap ni roha na jahat asa mate sudena jala mulak mangolu hita ganup ari gabe jolma na imbaru, na tigor jala na ias roha, na mangolu di jolo ni Debata salelenglelengna.

VII.Di dia do tarsurat hata i?

Didok si Paulus do di suratna tu halak Rom i di bindu paonomhon: “Na tartanom do hita rap dohot Ibana marhitehite Pandidion i tu bagasan hamatean, asa marparange hita dibagasan ngolu na imbaru, songon Kristus naung hehe sian angka na mate hinorhon hasangaphon ni AmaNa”.

BAB V

Bindu Palimahon

Marulaon Na Badia

I.         Dia do lapatan ni na marulaon na badia?

Mangan sagusagu parhitean ni daging ni Tuhanta Jesus Kristus dohot minum anggur parhitean ni mudar ni Tuhanta Jesus Kristus songon na tinonahonNa i tu halak Kristen.

II.      Di dia do tarsurat na songon i?

Songon on do pandok ni si Mateus, si Markus, si Lukas dohot si Paulus, angka na mamaritahon Barita na Uli: “Dibuat Tuhan Jesus Kristus ma sagusagu borngin i uju tarjehe Ibana, didok mauliate, dung i diponggoli ma i, diparlehon ma i tu angka siseanNa huhut ma didok: ‘Jalo hamu ma, pangan ma, daginghu do i na nilehon humophop hamu. Bahen hamu ma songon i bahen parningotan di Ahu. Asa dung sun nasida mangan, dibuat ma panginuman i, didok mauliate, dung i ninna ma mandok nasida: ‘Jalo hamu ma, sude hamu manginum sian i. Ia panginuman on padan na imbaru ma on, hinorhon ni mudar na niusehon humophop hamu bahen hasesaan ni dosa. Molo hamu manginum songon i, bahen ma i parningotanmu di Ahu.

III.   Aha do laba ni na mangan dohot minum sisongon i?

Dipaboa Hata i do labana ai ninna do: “Na nilehon humophop hamu bahen hasesaan ni dosa, hangoluan dohot hasonangan marhitehite panganon na badia i. Ai disi hasesaan ni dosa, disi do dohot hangoluan dohot hasonangan”.

Hinorhon ni sipanganon dohot siinumon i do na nidokmi?

Ndang na hinorhon ni sipanganon dohot siinumon i, na hinorhon ni Hata i do na mandok: “Na nilehon humophop hamu, dohot na niusehon humophop hamu bahen hasesaan ni dosa”. Ai angka hata na mandongani sipanganon dohot siinumon i, i do situan ni sipanganon na badia i, dung i manang ise na porsea di Hata i dapotan hasesaan ni dosa; ai i do pandok ni Hata i.

IV.   Ise do na manjalo panganon na badia i sian na ture?

Ia na mangontik sipanganon dohot na mangalinggas daging, ruhut na denggan do i nian, alai manang ise na porsea di Hata i, na mandok na nilehon humophop hamu bahen hasesaan ni dosa, i do na manjalo panganon na badia i sian na ture; Alai manang ise na so porsea, na ganggu roha, i do na so tau dohot majal ai ingkon porsea situtu do roha di Hata i na mandok: “Humophop hamu!”